GAMA BUDHI KAWERUH URIP SAJATI

JANGKEPE LAKUNE WONG JOWO

HASTO BROTO

Mulat laku anggentur anarik doyo

Soko njobo katarik dening karso

Badane kang anarik nyowoe kang ngrasakno

Hiyo rahso, rahsoning nyowo

Lumebu lumantar howo, kataman ing rogo

Sesepan doyoning bawono nyelaras ing njerone rogo

Yoiku kang sinebut topobroto

Doyo bawono kang rupo wolung perkoro

Bumi-gunung-samudro-angin

Suryo-lintang-mbulan-angkoso

PERTELANING HASTOBROTO

Topobrotoning bumi

bumi teles bumi garing katarik doyone

Topobrotoning gunung

gunung urip gunung mati kaserot doyone

Topobrotoning samudro

samudro butheg samudro bening kaserot doyone

Topobrotoning angin

angin pelan angin banter kaserot doyone

Topobrotoning suryo

panas uruping suryo kaserot doyone

Topobrotoning lintang

lintang panjer rino panjer wengi ingkang kumelip kaserot doyo getare

Topobrotoning mbulan

adem uruping mbulan kaserot doyone

Topobrotoning angkoso

awang uwung kang tanpo wates katarik doyone

Hastobroto iku wolung macem jinise topo, dudu mlajari watek/sifat isen isene bawono

hastobroto iku kaweruh wengkuning ratu

dene manungso iku dudu gunung dudu angin yo ora biso dikoyo gunung lan angin

manungso hiyo dudu mbulan lan lintang yo ora biso dikoyo mbulan ugo lintang

PATRAPING TOPOBROTO

.Klawan menege rogo nganggo lungguh silo

.Makartine angen angen lan ciptoe dienggo fokuse marang karso

Karso iku ono ing mburine karep, kaaran kehendak

Hiyo kehendak anyerot doyoning bawono

.Panyeroting mau biso nganggo :

-ujung ujung jari

-epek epek tangan

-awak sakujur (pori pori kulit)

-ugo biso liwat mripat loro

.Panyeroting doyo mau kudu biso karasakake lumebune..hiyo iku rahsone….

kanggone sing ws laku ambegan jogorogo mestine y wis biso ngrasakno howo

dadi doyo sg melbu mau lumantar lumebune howo kang sinerot dening badan..

.Awite nggathuk nggathukno (nyelarasno)

.Banjur njumbuhno (proses panyerote)

.Wekasan ; manunggal (nglumpuk’e doyo kang sinerot ing njerone rogo)

TOPO BUMI

-bumi teles (bumi sing lemahe ora tau garing ; kyo bumi njeroning alas)

-bumi garing (hiyo bumi sing ora iso teles ; lamun teles mesti garing maneh)

Bumi teles luwih subur tinimbang bumi garing

TOPO GUNUNG

-gunung urip (gunung sing isih nyimpen magma ; drung entek magmae)

-gunung mati (gunung sing wus ora iso mbeldos ; magmae ws entek)

Gunung mati luwih subur tinimbang gunung urip

TOPO SAMUDRO

-samudro butheg (segoro sing banyune ora biso bening ; luwih cethek)

-samudro bening (segoro sing banyune ora biso butheg ; luwih jero)

Samudro bening luwih akeh panguripane tinimbang segoro butheg

TOPO ANGIN

-angin pelan (cilik ; ora banter lumakune)

-angin banter (gedhe ; banter lumakune)

Angin cilik ora biso dadi gedhe nanging angin gedhe biso dadi cilik

Angin gedhe iku kaaran maruto (badai ; yoiku udara sing katut ubengane bawono)

Angin cilik luwih adem tinimbang angin gedhe

*PENGETAN*

Wong topo iku meneng tanpo ngobahno rogo, yen sengojo ngobahno rogoe dibaleni maneh panyerotane

Parane topo iku ing kadigdayan (digdoyo)

dumunung ing wengku (ateges yo kuoso yo nguwasai yo biso ngemong)

mulane disebut wong sekti tanpo aji aji

digdoyo tanpo pusoko lan biso nggawe montro

Kabeh kabeh doyo kang sinerot iku tumuju ing ngurupno urip

yoiku ; nguwatno doyoning urip

Mulo sopo bae sing wus nguwasai hastobroto hiyo biso mengku angratoni jagad

amargo rogo iku duweni doyone bawono mulane hiyo biso sesambungan klawan isen isening bawono

SAMBUNGE HASTOBROTO

*

TOPO SURYO

Hiyo anyerot doyo panasing srengenge ing wayah isuk lan sore

ateges naliko sunari srengenge durung mencorong putih

awit srengenge isuk ; abang.. abang semu kuning.. kuning mencorong

srengenge sore ; kuning mencorong.. kuning semu abang…

TOPO LINTANG

Hiyo panyeroting doyone lintang

-lintang panjer rino (katone ing wayah padhange srengenge)

-lintang panjer surup (katone ing wayah surupe srengenge)

-lintang panjer wengi (mung katon ing wayah bengi)

-lintang blelek (lintang sing katon semu abang)

-lintang gubug penceng (lintang sing petane kyo gubung amung penceng)

-lintang ingkang kumelip (lintang sing kumelip ; jarake luwih adoh soko bawono)

kabeh lintang iku ngemu doyo getar (getaran) ; dudu adem dudu panas

TOPO MBULAN

Padhang ademe mbulan ing tanggal 12.13.14.15

ing wanci purnomo anyerot doyoning mbulan

TOPO ANGKOSO

Hiyo iku doyoning awang uwung hampa kang tanpo wates

doyoning petheng kang tanpo wekasan

meneng ing wayah bengi ing tengah latar katon langit

-bisane anyerot doyoning angkoso iku nalikane wus biso nyerot doyoning suryo condro kartiko.

PEPENGET

Yen manekung dumunung ing wisesoning rogo

topobroto ndunungi wengkuning ratu

Yen manekung iku makartino ciptoe

topobroto makartino karsoe

Bumi iku dudu lemah ; mung saben bumi ono lemahe

samono ugo gunung iku dudu bumi mulo doyone bedo bedo

Samudro iku dudu banyu ; mung saben samudro ono banyune

Angin iku dudu udara ; mung saknjerone angin ono udarae

Srengenge iku dudu geni ; mung saknjerone srengenge ono genie

Mulane manekung klawan topo iku bedo ing parane

amargo sangkane wus ora podho..

Yen manekung iku ngolah doyo saknjerone rogo

topobroto ngolah doyo saknjabane rogo

kekarone podo podo nglumpukno doyo..podo podo tunuju mundhaking doyo

podho podho klawan meneng patrape

Topo iku trmasuk panunggalan ; hiyo nunggal klawan isen isening bawono (nunggale nunggal pisah)

dene topo iku ora kawates ing wolung perkoro : kyo topo uwit, topo udan…..isp

PANYEROTAN :

Gathuk-jumbuh-nunggal

(nyelaras-nyerot-maligi)

WEKASANING WEDARAN

Dadi lakune wong jowo iku ;

-ngrowot ngalong

-ngebleng patigeni

-nginang mutih

-manekung topobroto

-semedi

Dene semedi iku : meneng ing neng temenan (bener bener meneng ; mahening suci) kaaran ; lerem

-menengno rogo

-ngeningno cipto

-ngenebno rahso

(gamblange wus ono ning wedaran : ingkang aran lerem)

Jangkep wutuh hiyo maligi ing santosa

Jejeg ajeg jumeneng wiseso maseso

Mengku tan kawengku

Linuwih mumpuni dadine

Sukmo kang wiseso

Badan kang mengku

Jiwo kang salin rupo

Dadi tetep ing santosa lan sampurnaning rogo

Tanpo dungo tanpo pusoko hiyo digdoyo

Klawan laku spirituale wong jowo.

GAMA BUDHI KAWERUH URIP SAJATI

Podo Rahayuo , Sagung Dumadhi

Read More

GAMA BUDHI KAWERUH URIP SAJATI

:::::::::::::::::::::

SAMBUNGE LAKUNE WONG JOWO

----------

MANEKUNG

Ngolah doyo ing saknjeroning rogo

Ngolah unsure bawono ing njerone rogo

Lemah banyu udara geni

Petheng adem padhang panas

Menenge rogo kagowo angolah doyo

Klawan cipto makartining sukmo

Yoiku manekung kang ateges nggembleng

Hiyo musatno cipto ing sawijine unsuring rogo

Manekung iku pepdhane meditasi

Cokroning banyu mubeng ing njerone rogo

Cokroning angin mubeng ing njerone rogo

Wiwit manekung ing lemah 

Manekung ing banyu

Manekung ing udara

Manekung ing geni

Doyo petheng sesambungane unsur lemah

Doyo padhang sesambungane unsur udara

Doyo adem sesambungane unsur banyu

Doyo panas sesambungane unsur geni

PANEKUNGAN

Manekung iku sangkane kawisesan

Ateges panguwasaan

Yoiku anguwasai rogone dewe

Awit nguwasai unsur lemah nganti unsur genie rogo

WADAG NJOBO

Wulu..kulit..getih..otot..daging..balung..sum sum

WADAG NJERO

Ginjel..lambung..usus..ati..limpah..jantung..paru paru

WADAG ALUS

Jinem..sanu..puat..otot alus..nadi..jiling..damarmoyo..utek..pramono jati..isp

Wadag tetelu iku kaaran awak kasar (rogo)

Sing alus sing njero sing njobo gandheng sesambungan (nunggal pisah)

Unsur lemah banyu udara geni ugo doyo panas adem padhang petheng yo nunggal pisah

Nunggal pisahe kabeh mau kaaran jumenenge rogo

PATRAPING MANEKUNG

Lungguh silo 

Meneng ora obah awake

Ambegane biasa (ora ditahan ora dibanterno)

Musatno cipto marang rogoe

Diarahno ing unsur lemah wiwitane

Yoiku ; kulit otot daging ginjel lambung usus ati limpah jantung paru paru

Unsur lemah iku minongko pambuntel (wadah)

Kawengku dening pratiwi (pambuntel wutuhe rogo)

Dadi pratiwi iku pancere unsur lemah

Manekung ing banyu

Saknjerone kulit otot ginjel limpah ati usus jantung lambung

Rupane abang ireng yoiku getih

Rupane putih yoiku sumsum nanah

Rupane bening yoiku kama

Ono maneh banyune kamanungsan iku sing dadi panglengkete kabeh pirantining rogo

ora keno diowahi yo ora ngowahi

Ora ngrusak ora keno rinusak

Dumununge ora ing njobo ugo ora ing njero

Yoiku sing dadi lantarane roso asmorojati

Unsur banyu pancere ono ing lambung (segoro bebanyu)

Ubengan cokro banyu pencere ning jantung

Manekung ing udara

Awit balung ugo sum sum (udara doyo adem petheng)

Udara iku meneng, obahe kaaran angin

Udara ngebeki kabeh pirantining rogo

Ateges kabeh wadag ono udarae nganti ing banyu yo ono udarae

Dene pancere udara ono ing wadag alus

Pancer cokro ubengane ono ing paru paru

Manekung ing geni

Geni iku dudu panas tapi geni mowo panas

Yoiku pramono jati sing ono ing tengahe telenge dodo

Iku pancering geni saknjerone rogo

Dene cokro banyu ugo cokro udara ugo biso nganakake geni

PEPENGET

Arepo manekung ing geni disek utowo udara disek gak ono bedane

Mung urutan lapisane iku lemah banyu udara geni

Nalikane manekung wiwite yo nggathuk nggathukno 

Ngolahe iku nalikane ws sambung pamusate ciptane

Nganti tekan ing nguwasai

Dene patang unsur mau kawengku dening howo

Howo iku dumunung ing saknjerone udara (alusing udara)

Patang doyo kawengku dening gether

Dene gether pancering ono ing jiling (kekandhangane roso)

Dene howo amratani ing sajeroning wadag kabeh

Ono topobrotoning angin

Ono manekung ing udara

Ono topobrotoning bumi

Ono manekung ing lemah

Ono topobrotoning samudro

Ono manekung ing banyu

Ono topobrotoning suryo

Ono manekung ing geni

Nalikane biso manekung ing nunggale patang unsur mau

Kaaran semedi tunggal (musatno langsung patang unsur)

Dene unsur saknjerone rogo iku ora mung papat

Ono akeh sakpirang pirang, nanging intine amung papat

Samono ugo doyoe yo ora amung papat, ono akeh nanging intine mung papat

Mergo ono lemah ketemu banyu

Banyu ketemu padhang

Padhang ketemu udara

Udara ketemu geni lan sakteruse………..

GAMA BUDHI KAWERUH URIP SAJATI

Podo Rahayuo , Sagung Dumadhi

Read More

GAMA BUDHI KAWERUH URIP SAJATI

_____________________________

LAKUNE WONG JOWO

MEMAYU HAYUNING BAWONO

Poso iku cegah dahar cegah ngombe

Karepe ngemposno roso

Sejatine olehe nyegah ngunuiku mung ngemposno rahso (karep)

Amargo rogone soyo ringkih

Nalikane ws suwe ora mangan

Tetep bae rosoning ilat ora kempes

Ugo roso roso liyane tetep rosa makarti

Ingkang mangkono iku nuduhno lupute

Luput soko sangkane : karep ngemposno roso

Parane nuju tangine roso

Ora ono ngemposno roso sakliyane nganggo meneng.

Rogo iku bawono niro

bawono sing ono ing njero

hiyo bawono sing meh ora ono bedane karo bawono njobo

rogo kae ngemot sapirang pirang doyo soko bawono njobo

awit doyo alus kasar nganti wiji wijining urip

soko pepanganan2 sing dipangan dening rogo

NGROWOT

Yoiku lakune wong jowo, amung mangan krowotan

krowotan iku polo pendem

polo pendem iku tunggale telo, kentang, tales, uwi……….isp

rogone mung kaisi wiji2 urip sing kependem (njero lemah)

ning kunu pamrihe, supoyo meruhi kawruh kawruh sing kependem

ateges kaweruh kang siningit

lantaran rogone sing kaisi sapirang pirang doyo urip ing njerone lemah

hiyo wus ora mangan babarblas sakliyane krowotan nganti pirang pirang dino

NGALONG/NGLOWO

Yoiku lakune wong jowo, mung mangan woh wohan

hiyo woh wohan sing cumentel ning dhuwur uwit

koyo apel, jeruk, pelem, kates……isp

ateges kang gumantung ing duwur

dadi rogone mung diisi wiji2 urip sing ono ing awang awang

pamrihe supoyo meruhi kawruh kawruh kang kumambang ing udara

ateges kawruh awang awang

hiyo ora mangan sakliyane woh wohan nganti pirang pirang dino

NGEBLENG

Iku lakune meneng ora obah ora turu ora mangan ora ngombe

patrape meneng total sedino sewengi

ngebleng iku lakune wong topo

amargo laku topo lumrahe dipungkasi karo ngebleng

dene parane topo iku kasekten

PATIGENI

Iku meneng ono ing sajeroing pepetheng

tanpo keno cahyo, tanpo katon cahyo

patigeni yo ora mangan ngombe turu

makartine urip ing njerone petheng

biso linakonan sedino sewengi - telung dino telung bengi

NGINANG

Yoiku patrap mung mangani gegodhongan

hiyo samubarang godhong godhongan sing keno dipangan

ateges godhonge ora ono erine ugo ora kasar (godhong jati)

saiki mangan godhong kae disebut mangan sayuran

dene nginang iku mangani godhong mentah

ora dimasak mateng njur dipangan

amargo tumrape wit witan godhonge iku sing nyadhong pepangane

dadi sari nutrisine kabeh uwit iku ono ing godhonge

MUTIH

Yoiku patrap mung mangan sing ora ono uripe

karepe mutih iku murnino rogo

wong mutih iku dudu patrap mung mangan sego + banyu bae

dene sego iku soko beras, beras soko pari, pari kae yen disebar ning lemah biso tukul dadi uwit

yen beras disebar ning lemah ora thukul amargo wus ilang kulite (gabah)

podo koyo isine pelem (pelok) iku menowo diilangi kulite

yo ora biso ditandur thukul

jagung disebar thukul, kacang disebar thukul, ateges kabeh biji yen disebar thukul, amargo ning kunu ono uripe…

dene mutih iku ora mangan sing ono uripe

mutih ikuloh sejatine laku memayu hayuning urip

WEKASANE LAKU JOWO

Ngrowot lan ngalong iku gandengane laku, ngrowot disek opo ngalong disek podo bae….

amargo ngrowot lan ngalong iku laku kang tanpo wates

mulane keno dilakoni sedino sewengi nganti sapirang pirang dino lan wengi…

Yen ngrowot yo ngrowot ora biso diwor karo ngalong

nanging ngowot lan ngalong iku podo podo duwe piguno

ngresiki rereget2 sing ono ing njerone rogo

nteges rereget iku sari sari sampah sing ora dibutuhno rogo

dadi ngrowot iku mbatesi rogone soko pepanganan sakliyane krowotan nganti pirang pirang dino

ngalong iku mbatesi rogone soko pepnganan sakliyane woh wohan

dene ngombene towo legi kecut ora kawates

Bangsane krowotan iku wiji wiji urip sing ono ing njero lemah

Bangsane woh wohan iku wiji wiji urip sing ono ing awang awang

Ngebleng lan patigeni iku gandhengan

sing siji mung mbatesi awake sedino sewengi

sijine ketambahan mbatesi awake ing pethengan

kekarone iku patrap meneng ora mangan ngombe koyo wong semedi

mung iku laku topo nyuwungno rogone

ora keno moco moco muni muni kejobo mung meneng anteng

amargo nyuwungno rogo mulo parane ning kasekten

Nginang lan mutih iku hiyo gegandhengan

tegese kaaran gandheng iku mangkene

nginang iku mangani gegodhongan

dene ning gegodhongan kae ora onon wiji uripe uwite

amung ono sari pepanganane uwit

pirantine uwit kanggo nyadong pepanganane iku ono ing godhong lan oyote, mulane njur ono sing diarani ginseng lan pigunoe

dene amargo oyote kae ora biso diuntal, lan yen mangan oyote, uwite njur mati, mulane ora wenang dipangan

Mutih iku patrape mung mangan :

-Pohong/singkong sing dibakar ora keno digodhog

dibisao uwite (kayune) pohong mau ditandur maneh, amargo wiji uripe ono ning kunu

-Gedhang mateng uwit

-kembang sing wus uwal teko uwite (lugur)

-Ngombene : ora keno sakliyane banyu mili

mutih iku perlune murnino rogo, nyalin rogone supoyo dadi rogo sing murni

ateges murni iku ora kecampuran.

Dene semedi-meditasi-topobroto

Ngrowot-ngalong-ngebleng-patigeni-nginang mutih

iku kabeh ugo tradisi spirituale wong jowo.

GAMA BUDHI KAWERUH URIP SAJATI

Podo Rahayuo , Sagung Dumadhi

Read More

GAMA BUDHI KAWERUH URIP SAJATI

JANGKEPE JOWO JIWOKU

Nunggal laras sesambungane doyo

Rasuk rinasuk seksen sineksenan

Nunggal jagad sesambungane urip

Weruh wineruhan paseduluran

Hiyo sedulur tunggal ibu ..sedulur tunggal moho ibu ..sedulur tunggal sang ibu

SEDULURAN

Rogo klawan rogo liyane iku seduluran..iki ora ngomongno bangsane manungso nanging seduluran bongso rogo

Awit sato gegremetan sato galak iku yo nggowo rogo nyandang rogo

Jiwo jowo iku nganggep kabeh bongso sato iku sedulure dewe

Olehe nganggep yo kyo nganggep dulur ing tunggal wong tuwo

Ora mung dianggep hama ugo ingon ingon kanggo pepanganan

Nanging yo ora agawe cidro koyo olehe ora gelem nyidrani dulure tunggal wong tuwo

Mulane leluhur niro iku biso serawungan marang bongso sato opo bae ugo biso ngerti bosone bongso sato

Nalikane wus weruh wineruhan ateges iku ws sesambungan

Anane biso sesambungan iku amargo ono tunggal pepadhan

Rogo klawan rogo

Sukmo klawan sukmo

Badan klawan badan

Nyowo klawan nyowo

Jiwo klawan jiwo

Nunggal laras sesambungan manut doyone..nunggal jagad sesambungan manut uipe

rogo klawan rogo liyane iku sedulur ; yoiku dulur tunggal poncodriyo

sukmo klawan sukmo liyane hiyo sedulur ; yoiku dulur tunggal astendriyo

badan klawan badan liyan ugo sedulur ; ateges dulur tunggal tilasing driyo

nyowo klawan nyowo liyan ugo sedulur ; ateges dulur tunggal tilasing driyo ugo

amago dununge tilasing driyo ono ing nunggale badan lan nyowo

jiwo klawan jiwo liyan ugo sedulur ; hiyo dulur tunggal urip

Mulo sejatine kabeh kabeh iku sedulur awit bongso setitah bongso dumadi bongso jalmo

Sing ngrambyang sing ndhanyank sing ngaruhun hiyo sedulur

Opo maneh bongso dumadi klawan bongso dumadi

Mung kacik alus kurang alus..murni kurang murni

Sing diarani nisto iku nalikane agawe cidro ing dulure dewe

Nalikane ora ngakoni ing dulure dewe mulane banjur wuto uripe

Sih katresnan iku rosoing nugroho

Dudu pangirone angen angen dudu panggraitone cipto

Dudu roso dhemen dudu asih klawan pilih pilih

Ora ndunungi urip sing isih nggelar swargo naroko

PERTELANE BEBASAN

Boso ; bowo lan solah ; ateges dasar sikap (dasare gerak)

Wong weruh bosone sato koyo wedus sapi asu dll bosone macan kijang dll

Iku ora bosone sworo nanging bosone tingkah polah ugo bosone rupo lan pangroso

Amargo jowo jiwone, mulane yo ngerti maksut obah lan menenge dulure

Mangerteni ing pikarepe dulure (kabeh dumadi)

Dene kanggone sing wus waskito malah ngerti ing bosone wit witan

PEPENGET

Sesambungan iku werno loro ; sesambungan ing doyo lan sesambungan ing urip

Kliru yen ngarani ngerti bosone sato iku soko sworo/munie sato

Amargo akeh bongso sato iku olehe ngomong/komunikasi klawan tanpo sworo

Ugo ono sing nganggo sworo frekuensi tinggi/rendah nganti ora biso dirungu dening pangrungune uwong

Dadi jalarane ngerti ing bosone sato iku amargo wus nunggal klawan jejagading bongso sato

Mulane yo weruh..kyo olehe weruh pandulu klawan pandulu ing rerupan

Nunggal iku ono ing saknjerone sambung/jumbuh..saknjabane sambung iku aran gathuk

Bongso sato iku bangsane binatang yoiku ;

(sing ngambah udara/kikula/peksi..sing ono ing njero banyu/iwak/mina.. njero lemah/gegremetan ugo ing duwur lemah)

Dadi kanggone sing wus mangerteni urip sing kaaran mungsuh iku ora ono

Wruho niro ; sih iku sawijine roso kang tumuju ngenani ing sa gung dumadi ; mulane banjur ono lebur dening pangastuti

mulane angkoro njur ora biso murko

Wong ngakoni yen kabeh iku sedulure, banjur katon asu koyo ndeleng mungsuh

Katon tikus banget gethinge ora koyo ndeleng dulure tunggal wong tuwo

Iku nyatane yen isih durung jowo jiwone

Isih durung mangerteni “ibu bumi bopo angkoso”

Jowo jiwoku iku ateges : Manunggaling moho tunggale jagad.

“Podo Rahayuo Sa gung Dumadi”

GAMA BUDHI KAWERUH URIP SAJATI

Podo Rahayuo , Sagung Dumadhi

Read More

Ora Nyembah Ora Sinembah ( tan anyembah )

ORA NYEMBAH TAN SINEMBAH

GAMA BUDHI KAWERUH URIP SAJATI

Kencono wungu gumilang sangkan 

soroting suryo padhang jinglang

pethenge wengi kasinaran lintang mbulan

panembahan pamujaaning manungso

tanpo mangerteni sopo lan opo

Ono ingkang karep nyembah

ono ingkang wus nyembah

nganggo sarono macem macem kaaran ritual panyembahan

ono ing sajeroing papan pamujaan.

Tanpo weruh tanpo ngawikani

yoiku padunungane kapitayan

dudu padunungane pangawikan

uwong percoyo biso ora percoyo (was sumelang)

ananging wong wikan iku ngawikani (weruh)

ono kang nyembah amargo karep anyuwun

ono kang nyembah amargo karep mituhu

ono kang nyembah amargo roso matur ksuwun

Nalikane uwong kang anyembah katiban loro utowo nyandang sengsoro (kasusahan)

was sumelang ugo bebingunge anyanding uripe

amargo mokhal yen sing moho kuwoso menehi loro sengsoro

lan mokhal sing moho kuwoso wewatek sewenang wenang

ning sajeroing susah ono warto yen iku aran ujian (cobane sing kuoso)

yoiku palipur lorone kanggo nerusno olehe tetep anyembah

tunggale palipur loro maneh, yen bakal oleh kamulyan langgeng sakwuse pati

utowo yen gelem anyuwun ngerendah marang sing moho kuoso mesti bakal diwenehi opo sing dadi penjaluke

iku kaaran luputing arah lupute kang tinuju

isih ora weruh endi sing nyembah endi kang sinembah

Sing anyembah soko suka sukure mesti batal nalikane tompo kasusahan

sing anyembah soko mituhune mesti batal nalikane kuciwo

sing anyembah soko olehe anyuwun mesti batal yen ono sing ora kasembadan

sing anyembah soko anut grubyuk hiyo batal yen wus wikan

Dadi panyembahan sing molah maleh

ono sing amargo pingin oleh opo sing dikarepno

gumanti amargo pingin ucul soko sengsoro

gumanti amargo pingin oleh kamulyan sawuse pati lan sateruse

molah maleh owah osik gingsiring jiwone

iku kabeh amargo uwonge ora weruh marang sejatine

sopo sing nyembah

sopo sing sinembah

lan koyo opo olehe anyembah

Amargo nalikane nandang kasengsaran 

ora biso manembah karep ngaturake matur ksuwun

nalikane manembah pingin kamulyan sawuse pati

kabeh uwong mesti ora betah olehe ngenteni

manembaho amargo pingin kasembadan panjaluke

iku mesti ora kabeh penjaluke biso kasembadan

amargo yen saben panjaluke wong nyembah kasembadan

amesti jagad iki wus bubrah awit mbiyen

soko bedo bedoning panjaluke siji siji uwong

Sopo sing nyembah..

wangsulane hiyo manungso sing nyembah

endi manungsane, endi uripe, endi uwonge

sopo toh sajatine sing nyembah...

sing isih nyandang kasengsaran

sing isih nyandang getir kuwatir

sing isih nyandang pengarep arep (harapan)

iku kabeh ateges sing isih dumunung ing pepetheng

Ing sangkane anyembah ono parane kang sinembah

ora kabeh uwong nyembah podo parane

amargo bedone sangkan dadiake bedaning paran

awit getir kuwatir, sengsoro, pengarep arep

iku dadi sangkan olehe anyembah

mahanani bedane kang sinembah

Ono sing nyembah ono kang sinembah

ora ono sing nyembah ora ono kang sinembah

iku hiyo kaaran loroning tunggal

mulane bedo sing nyembah yo bedo kang sinembah

mulo perlu ngaweruhi sopo sing nyembah

Sopo kang sinembah..

yoiku sesembahan sesembahane wong akeh

dene gusti ingkang moho suci

iku dudu sesembahane kabeh uwong

amung dadi sesembahane sing podo suci suci kabeh

angen angen iku dadi sesembahane kabeh jiwo bongso donya

cipto ripto iku dadi sesembahane kabeh jiwo bongso kaendran

budhi iku dadi sesembahane kabeh wong bongso kadewatan

Kajaten ora nyembah ora sinembah

ora ono sing nyembah ora ono kang sinembah

yoiku jiwo jiwo bongso pengeran

aku kang wus lebur

ingsun kang jumeneng

budhi lan rosojati wus lebur nyawiji

kaaran jumeneng klawan pribadi.

GAMA BUDHI KAWERUH URIP SAJATI

Podo Rahayuo , Sagung Dumadhi

Read More

Pangaksumo ( Pangapuroh )

PANGAKSUMO

GAMA BUDHI KAWERUH URIP SAJATI

Ingkang tansah wales winales

lupute kajaluk ing pangapuro

lupute kaijol ing pangapuro

lali paukumane lali piwalese

wani ngelakoni yo wanio ing ukumane

gelem nglakoni malah wedi piwalese

mung nuduhno ing cilik atine...

Tumindak bener yo oleh kabecikan

tumindak salah yo oleh paukuman

bener lan becik mardi kautaman

salah tur olo mardine kasengsaran

Amargo isih akeh kasalahan sing diluputake soko paukuman

iku ora biso jejeg ing adile, adile iku laku bener tompo becik laku salah oleh paukuman

mulo banjur ora biso maju ora tinemu ing kabagusan

wong tumindak salah iku patut keno ukuman

paukuman kui sarono kanggo marekno wong salah, supoyo weruh ing salahe, supoyo ora dibaleni maneh..

wong salah njaluk pangapuro iku wus lumrah, ateges ngakoni ing salahe..mung tanpo anane ukuman, wong salah malah kerep anjaluk pangapuro, ngemohi ukuman ; arep enak ngemohi rekasaane.. mulo banjur dadi uwong sing cilik atine, ora wani nanggung opo sing wus dilakoni.

Wewatekaning jagad iku tansah wales winales, wong salah wong tumindak cidro tumindak angkoro agawe kapitunan, senajan wus anjaluk pangapuro anjaluk kawelasan, ateges emoh ing ukumane, iku ora tinemu kejobo, pangadilaning jagad tetep paring ing gegantungane dewe dewe : sopo becik begjo sopo olo ciloko..

mulo anjaluk ukuman marang kang kapitunan iku luwih utomo tinimbang anjaluk pangapuro

iku ateges wewatekane uwong ingkang jejeg adil, ora malah karep diluputno ing ukumane..

Mangertiyo pangapuro iku dudu piwalese kesalahan.

Uwong sing dhemen anjaluk pangapuro, iku ateges dhemen diapuro

yoiku manungso ingkang enteng tekad, cilik atine, wani nglakoni ora bener, amargo biso njaluk pangapuro

yoiku manungso sing ora biso jejeg, ora biso adil, ora biso weruh ing kaluputane dewe..

dadi wong sing aweh pangapuro iku podo bae karo ngajeni wong salah, supoyo baleni nglakoni salah maneh

laku salah oleh pangapuro, laku bener kangelan : mulane pangapuro iku tetep kaaran ngajeni kesalahan...

upamane ora ono pangapuro, dunyo iki wus bagus edine.

GAMA BUDHI KAWERUH URIP SAJATI

Podo Rahayuo , Sagung Dumadhi

Read More

Padunungan ( dununge )

PADUNUNGAN

.Akeh sing isih ngarani roso pangroso iku dumunung ono ing ati

.sing ono ing saknjerone ati iku angen angen

.saknjerone angen angen iku cipto

.roso pangroso iku dumunung ing jantung

.susah bungah gething dhemen wedi wani

.iku sg gawe owah gingsire kahanan jantung

.Dene koyo angen angen sg petheng (bingung) iku mergo katumusan roso pangroso

.samono ugo gingsire cipto y mergo kacampuran pangroso

.dene utek iku pucuk.e budhi

.bongkote budhi kaaran budhi kawruh kang ono ing wang wung

.Dadi sing diarani loro ati kae, angen angen sg lagi petheng...kurang sorot sunaring budhi..

.koyo mangkel muring nesu iku uwohing susah, nganti anjalar ing angen angen..

.angen angen sg katumusan pangroso kyo mangkono iku arane rahso (rosoning karep)..

hiyo rahso kang isih kasar, ndadekake pethenge angen angen

.wekasan dumunung ing gung liwang liwung.

.dadi padunungane wong wong bongso neroko..

GAMA BUDHI KAWERUH URIP SAJATI

Podo Rahayuo , Sagung Dumadhi

Read More

Pasinaon ( Moco )

PASINAON

.ono pangerten

.ono kapercayaan

Kabeh uwong sing ngudi kawruh...iku ono loro parane..

.siji : ing pangerten parane

.loro : ing kapercayaan parane

Pangerten iku oleh olehane ngerti....podo ae kro kaweruh (oleh olehane weruh)..

sing weruh lan sing ngerti iku dirine...ateges dirine iku wis sambung seksen sineksenan (pangrungu weruh sworo ; dadi sworo iku pangertene pangrungu..ateges sworo iku oleh olehane pangrungu ngerti/sambung.seksen.sineksenan)

Samongso ora mangkono ; kawruh sing diudi mau dumunung ing kapercayaan...

dene kapercayaan iku dudu pangerten dudu kawruh...nganti dirine biso sambung nyatakno..

nalikane wus sambung nyatakno...kapercayaan owah dadi pangerten/kawruh..

dadi kapercayaan iku tanpo kasunyatan tanpo kawruh

Dene pangerten iku ndunungi kasunyataan.

dadi kabeh kabeh iku kapercayaan arane yen tnpo dinyatakno..

kabeh kabeh iku anggep anggep yen ora biso nyatakno...

tegese nyatakno iku mbuktino...dene mbuktino iku biso nganggo coro sing maneko werno...

wong percoyo tnpo biso nyatakno/meruhi dewe ; luput

wong meruhi dewe tanpo percoyo ; bener.

dadi wong weruh iku ws mesti percoyo

tp wong percoyo ora mesti weruh...

dadi ono ;

kawruhe kapercayaan

ono kawruhe pangerten

.Kawruh kapercayaan iku kawruh mati/mandeg

.kawruh pangerten iku urip/berkembang

lha karo karone iku kaaran plajaran/pasinaon...

sinau : mlajari.

wong sinau iku pingin weruh/ngerti

tp tnpo meruhi/ngerteni/nemu nyatane iku arane oleh kapercayaan.

pepindhane pangerten iku koyo pangrungu weruh sworo

pepindhane kapercayaan iku koyo pandulu weruh sworo... 

sworo iku ono ...amargo pangrungu wus nyatakno onoe..

sworo iku ono amargo pandulu ora biso nyatakno mulo dadi kapercayaane pandulu.

kog dinyatakno poncodriyo ora biso...iku brrt dudu kawruhe poncodriyo..

angen2 ora biso nyatakno

cipto dalah budhi ugo ora biso nyatakno...

roso pangroso ugo ora biso dienggo nyatakno...yoiku sejatine KAPERCAYAAN 

(ing salawase ora bakal ono nyatane).

GAMA BUDHI KAWERUH URIP SAJATI

Podo Rahayuo , Sagung Dumadhi

Read More