GAMA BUDHI KAWERUH URIP SAJATI

:::::::::::::::::::::

SAMBUNGE LAKUNE WONG JOWO

----------

MANEKUNG

Ngolah doyo ing saknjeroning rogo

Ngolah unsure bawono ing njerone rogo

Lemah banyu udara geni

Petheng adem padhang panas

Menenge rogo kagowo angolah doyo

Klawan cipto makartining sukmo

Yoiku manekung kang ateges nggembleng

Hiyo musatno cipto ing sawijine unsuring rogo

Manekung iku pepdhane meditasi

Cokroning banyu mubeng ing njerone rogo

Cokroning angin mubeng ing njerone rogo

Wiwit manekung ing lemah 

Manekung ing banyu

Manekung ing udara

Manekung ing geni

Doyo petheng sesambungane unsur lemah

Doyo padhang sesambungane unsur udara

Doyo adem sesambungane unsur banyu

Doyo panas sesambungane unsur geni

PANEKUNGAN

Manekung iku sangkane kawisesan

Ateges panguwasaan

Yoiku anguwasai rogone dewe

Awit nguwasai unsur lemah nganti unsur genie rogo

WADAG NJOBO

Wulu..kulit..getih..otot..daging..balung..sum sum

WADAG NJERO

Ginjel..lambung..usus..ati..limpah..jantung..paru paru

WADAG ALUS

Jinem..sanu..puat..otot alus..nadi..jiling..damarmoyo..utek..pramono jati..isp

Wadag tetelu iku kaaran awak kasar (rogo)

Sing alus sing njero sing njobo gandheng sesambungan (nunggal pisah)

Unsur lemah banyu udara geni ugo doyo panas adem padhang petheng yo nunggal pisah

Nunggal pisahe kabeh mau kaaran jumenenge rogo

PATRAPING MANEKUNG

Lungguh silo 

Meneng ora obah awake

Ambegane biasa (ora ditahan ora dibanterno)

Musatno cipto marang rogoe

Diarahno ing unsur lemah wiwitane

Yoiku ; kulit otot daging ginjel lambung usus ati limpah jantung paru paru

Unsur lemah iku minongko pambuntel (wadah)

Kawengku dening pratiwi (pambuntel wutuhe rogo)

Dadi pratiwi iku pancere unsur lemah

Manekung ing banyu

Saknjerone kulit otot ginjel limpah ati usus jantung lambung

Rupane abang ireng yoiku getih

Rupane putih yoiku sumsum nanah

Rupane bening yoiku kama

Ono maneh banyune kamanungsan iku sing dadi panglengkete kabeh pirantining rogo

ora keno diowahi yo ora ngowahi

Ora ngrusak ora keno rinusak

Dumununge ora ing njobo ugo ora ing njero

Yoiku sing dadi lantarane roso asmorojati

Unsur banyu pancere ono ing lambung (segoro bebanyu)

Ubengan cokro banyu pencere ning jantung

Manekung ing udara

Awit balung ugo sum sum (udara doyo adem petheng)

Udara iku meneng, obahe kaaran angin

Udara ngebeki kabeh pirantining rogo

Ateges kabeh wadag ono udarae nganti ing banyu yo ono udarae

Dene pancere udara ono ing wadag alus

Pancer cokro ubengane ono ing paru paru

Manekung ing geni

Geni iku dudu panas tapi geni mowo panas

Yoiku pramono jati sing ono ing tengahe telenge dodo

Iku pancering geni saknjerone rogo

Dene cokro banyu ugo cokro udara ugo biso nganakake geni

PEPENGET

Arepo manekung ing geni disek utowo udara disek gak ono bedane

Mung urutan lapisane iku lemah banyu udara geni

Nalikane manekung wiwite yo nggathuk nggathukno 

Ngolahe iku nalikane ws sambung pamusate ciptane

Nganti tekan ing nguwasai

Dene patang unsur mau kawengku dening howo

Howo iku dumunung ing saknjerone udara (alusing udara)

Patang doyo kawengku dening gether

Dene gether pancering ono ing jiling (kekandhangane roso)

Dene howo amratani ing sajeroning wadag kabeh

Ono topobrotoning angin

Ono manekung ing udara

Ono topobrotoning bumi

Ono manekung ing lemah

Ono topobrotoning samudro

Ono manekung ing banyu

Ono topobrotoning suryo

Ono manekung ing geni

Nalikane biso manekung ing nunggale patang unsur mau

Kaaran semedi tunggal (musatno langsung patang unsur)

Dene unsur saknjerone rogo iku ora mung papat

Ono akeh sakpirang pirang, nanging intine amung papat

Samono ugo doyoe yo ora amung papat, ono akeh nanging intine mung papat

Mergo ono lemah ketemu banyu

Banyu ketemu padhang

Padhang ketemu udara

Udara ketemu geni lan sakteruse………..

GAMA BUDHI KAWERUH URIP SAJATI

Podo Rahayuo , Sagung Dumadhi

Read More

JANGKEPE JOGO ROGO

GAMA BUDHI KAWERUH URIP SAJATI

Mbuwang wedi nukulno wani

tegese wani iku tatag ngadepi

tanpo ono getir kuwatir

tanpo ono getun ing mburi

ambuwang was sumelang soko diri

hiyo iku lawangane piyandel ing diri

tatag teteg mulo banjur teguh diri

ora perlu wedi wedi

mulat sariro hangroso wani.

ROGO ENOM LAN ROGO TUWO

Wiwit rogo iku salin rupo saben pitung taon sepisan

ateges ganti rupane

ono rupo enom rupo tuwo

ono awak enom awak tuwo (rogo)

ono umur enom umur tuwo

katelune iku bedo ing padunungane, ojo disengguh asin podo uyahe

kedadiane :

ono rogo enom - umur enom - rupo enom

ono rogo enom - umur tuwo - rupo tuwo

ono rogo enom - umur enom - rupo tuwo

ono rogo enom - umur tuwo - rupo enom

Dene rogo enom iku awake luwih kuwat

ateges ora gampang keno leloro

hiyo cepet warase, naliko awake catu (kebacok/keno paku isp ; luka)

rogo enom iku ora ringkih poncodriyone

rogo enom iku dununge doyo kakuwatane awak

rogo enom iku dudu umur enom dudu rupo enom

rogo enom iku ateges rogo ingkang ora ringkih

dene ringkihe rogo iku gampang keno loro leloro

Dadi ;

ono rogo tuwo - umur tuwo - rupo tuwo

ono rogo tuwo - umur enom - rupo enom

ono rogo tuwo - umur tuwo - rupo enom

ono rogo tuwo - umur enom - rupo tuwo

Rogo tuwo iku rogo sing wus ringkih

rogo tuwo iku rogo sing arep rusak

dene enom tuwone rogo iku ora gumantung ing umur

enom tuwone rupo ugo ora gumantung ing umur

amargo awak rupo umur iku bedo pilah pilahe

NJOBO NJERONING ROGO

tegese rogo iku awak kasar

piranti piranti alus lan kasare rogo kawengku dening pratiwi

yoiku pambuntele kabeh pirantining rogo

wutuhe rogo kaaran wadag (wadahe piranti alus kasare manungso)

Ginjel - limpah - usus - lambung - ati - jantung - paru paru

iku sarupane wadag sing ono ing njero

Wulu - kulit - getih - daging - otot - balung - sumsum

iku sarupane wadag sing ono ing njobo

Dene sing ono ing sajeroing jantung iku jinem

tegese siji sing duweni doyo enem

yoiku pangecap pandulu pangambu pangrungu pangroso awak

kaaran poncodriyo, sing kaenem arane sanu

yoiku bibite loro lan waras

dene sing ono ing sajeroing ati iku cipto

sing dadi kakuwatan iku otot alus

yoiku sing mahanani gegandhengane jagad cilik klawan jagad gede

otot kurang alus (nadi), yoiku sing dienggo noto kahanan sajeroing rogo

kaaran utek yoiku papaning piranti sing mahananai gegathukaning kahanan ing njobo lan ing njero

iku mau kabeh kaaran wadag alus

JOGO ROGO

Iku njogo marang enome rogo

suksmo iku njogo rogo soko njero

ateges dayani marang rogo, mulane rogo ora biso bosok ateges awet

badan iku dayani rogo soko njobo

yoiku sing anyerot howo lumebu rogo, liwat kulit (pori pori)

ringkihe rogo durung mesti tuwone rogo, mung rogo tuwo iku mesti ringkih

pandulune ringkih-pangecape ringkih-pangrungune ringkih-pangambune ringkih-pangroso awake ringkih

ateges ringkihe poncodriyo ikuloh rogo tuwo

amargo jinem sing ono ing sajeroing rogo wus redup sunare

ringkihe iku mahanani loro leloro

nalikane wadag njero ringkih, hiyo mahanani loro leloro

Dene wadag njobo ;

wulu ringkihe gumantung ing kulit

ringkihe kulit gumantung ing getih

dadi nalikane getih ora ringkih, kulite hiyo sehat (waras)

yoiku dununge rupo tuwo rupo enom

ringkihe getih gumantung ing daging

ringkihe daging gumantung ing otot

ringkih kuwate otot gumantung ing balung

dadi nalikane balung ora ringkih, otote hiyo sehat (waras)

yoiku padunungane pegel lan rosane rogo

dene ringkihe balung iku gumantung ing sumsum

sumsum iku dadi punjer utowo dadi pusere wadag njobo

jaganen rogomu, ojo nganti keno leloro

nalikane keno loro, kaweruhono jalaran warase

ojo nganti waras tanpo meruhi jalarane

hiyo ojo nganti loro tanpo meruhi jalarane

loro waras loro maneh waras loro maneh

koyo mangkono sateruse yen ora meruhi jalarane.

PENGETAN

Loro leloro iku ateges kahanan ringkihe rogo (gk sehat)

mangano ing sambarang pepanganan iku ora biso dadekake rogone loro

yen wadag nero ora ringkih

ngombeo sambarang banyu hiyo ora biso andadekake rogone loro

nalikane wadag njero ora ringkih

ambegan o sambarang udara ugo ora biso dadekake awake loro

nalikane wadag njero biso nompo

dene udara iku ateges kempeling doyo sing ora biso wudhar (ucul)

awit udara banyu pepanganan iku kabeh isine doyo doyo

sing diolah ono ing sajeroing rogo

amargo rogo enom iku biso ngolah sambarang doyo

mulane hiyo ora dadi ringkih nalikane keno doyo doyo maneko werno

malahan iku biso dadi panguwat tumrap rogone ; wong awake ora tawar keno upas ulo

iku yen pingin tawar, ngombeo upas ulo

ora tawar iku amargo rogone ora biso nylaras doyone

dadi nalikane awak wus kaisenan upas, biso tawar ing upas ateges biso nylaras

rogo enom iku dudu umur enom rupo enom

hiyo dudu rogo kebal bacok kebal obong

nanging rogo enom iku cepet olehe waras nalikane keno bacok keno obong

rogo enom iku biso nompo sambarang doyo soko njobo

rogo enom iku ora ringkih ora gampang keno leloro

rogo enom iku biso dijogo dadi ingkang tanpo pegel tanpo loro

dene salin rupane rogo ing saben pitung taon sepisan

iku jalarane rupo enom nganti rupo tuwo

hiyo awit pitung taon-patbelas taon-selikur taon lan sateruse....

ono sing banget olehe salin rupo ono sing ora

gumantung kahanane rogo ing mangsane salin rupo

dene umur iku minongko tetenger kanggone rogo

dudu wates tondo enom tuwone rogo

umur iku dumunung ing mongso, ora dunungi enom lan tuwone rogo

samono ugo rupo, hiyo ora dunungi enom tuwone rogo

dene kanggone sing anggawe susuk (melbuno emas ing daging)

iku biso mahanani rupo enom tanpo salin

wadag njero wadag alus wadag njobo iku nunggal, ateges dadi siji

mung nunggale iku nunggal pisah

amargo nunggal mulane hiyo jumbuh, ateges sesambungan antarane sing alus sing njero sing njobo.

SAMBUNGE JOGO ROGO

Ora ono njobo ngowahi njero, ora ono kasar biso ngowahi alus

mulo tetep sing marai rogo loro (keno penyakit)

iku amargo njerone sing ringkih

ono kalane amargo ubengane doyo sing ora timbang

sing dadi jalarane ora timbang biso soko njobo biso soko njero

jalaran sing soko njobo iku rupane sing dilebokno ing rogo

koyo udara banyu pepanganan

jalaran sing soko njero iku :

badan ; nalikane badan ringkih utowo kurang olehe anyerot howo (kulite reget)

suksmo ; nalikane suksmo ringkih andadekake wadag njero ringkih

rahsa ; rahsa iku dumunung ono ing nyowo

amargo kerep katerjang ombaking rahsa, mulo ragane luwih cepet tuwo

ombake rahsa iku akeh banget cacahe, mung kabeh hiyo sesambungan

awit nesu manglah muring susah

awit was sumelang bebingung lan wedi

iku kabeh ateges ombaking rahsa

dene koyo dhemen, bungah, seneng iku hiyo rahsa, mung ora dadi ombak

dene ombaking rahsa iku dadi jalaran angrusak rogo

dadine ;

sing sopo kerep susah sumusah iku luwih tuwo ragane 

tinimbang sing kerep bungah bebungah

dene ombaking rahsa sing gede dewe iku wedi saknisore wedi was sumelang saknisore maneh iku bebingung

Sing soko njobo rupo udara iku gumantung ing tenggorokan lan paru paru

sing njobo rupo banyu iku gumantung ing lambung

sing njobo rupo pepanganan iku gumantung ing limpah lan ginjel

sing disebut penyakit utowo sing marai loro leloro

iku sejatine mung rogone ringkih

amargo rogone ringkih mulane ora biso nyelaras doyo soko njobo

banjur ubengane doyo sing ono ing njero dadi ora timbang.

PEPENGET

Nalikane ono rahsa mesti bareng karo onoe roso

kaaran rosoning karep (rahsa)

Dene onoe roso bareng karo onoe rahsa

kaaran kareping roso (roso pangroso)

mung onoe roso ora mesti bareng onoe rahsa (sangkalpa)

dadi rahsa karo roso iku nunggal pisah

Ora usah wedi wedi

ing sambarang kedadean marang sabarang perkoro

getir kuwatir arane 

yoiku nalikane wedi marang opo opo sing durung kedadean

getun arane

yoiku nalikane wedi marang opo opo sing wus kedadean

wingit arane

yoiku telenge wedi sing ono ing sajeroning sanubari

wedi iku ombanking roso sing gede dewe

dene koyo was sumelang lan bebingung iku ancer ancere wedi

wedi iku banget olehe ngusak rogo

sing mahanani rogo luwih cepet tuwo.

Jogo rogo

Murih pikuwating rogo

Murih lestari enoming rogo

Tumuju marang rogo sentoso

Santosaning rogo 

Nuju jejeg jumeneng enoming rogo

Yoiku tetep wutuh ing enome

Yo enom rupane hiyo enom rogone.

GAMA BUDHI KAWERUH URIP SAJATI

Podo Rahayuo , Sagung Dumadhi

Read More

JANGKEPE CUPU MANIK HASTOGINO

Rogo ingkang kasinungan dayane suksmo

balutane rogo slendange suksmo

suksmo kawetu ambuntel rogo

soyo lawas sangsoyo sampurno

ngrogo suksmo iku suksmone ngenggoni rogo

hiyo suksmo dadi pambuntele rogo

ngrogo suksmo 

iku dudu suksmo metu soko rogo

banjur kluyuran mrono mrono

Cupumanik Hastogino

CUPUMANIK iku WADAH ARUPO CAHYO

HASTOGINO iku DUWE WOLUNG PIGUNO

sing lumrae disebut ; cupumanik astagina

yoiku :

Tanpo kademen tanpo kepanasen

Tanpo pegel tanpo loro

Tanpo bungah tanpo susah

Tanpo luwe tanpo turu

Ingkang Wus Tanpo Kademen

Ateges rogone ora kademen nalikane keno doyo adem

hiyo rogo sing wus kuwat nompo gethering adem

tanpo kademen iku rogone wus biso betah adem

awit ademing banyu ugo angin

ateges rogo kuwat nyonggo kaademaning doyo bawono

tanpo kademen iku dudu ora keno adem utowo ora kroso adem

nanging kuwat lan betah marang adem

Ingkang Wus Tanpo Kepanasen

ateges rogo kang kuwat nyonggo doyo panasing bawono

mulo wus tanpo kepanasen

iku rogo sing wus kuwat lan betah marang panas

sing ora kuwat lan ora betah mesti kepanasen

nalikane keno doyo panasing bawono

Ingkang Wus Tanpo Pegel

yoiku rogo sing wus ora duweni pegel (lelah letih)

ateges doyone rogo wus lestari kakuwatane

Ingkang Wus Tanpo Loro

yo rogo sing wus ora tau keno loro ateges bagas waras

loroning rogo iku ringkihe rogo

lestarining rogo iku tanpo loro

hiyo samubarang loro leloro ora ngenani rogo

Ingkang Wus Tanpo Bungah Tanpo Susah

sirnoning bungah iku hiyo sirnoning susah

ugo sewalike

bungah bebungah iku ; karep sing katekan

karep iku doyoning arep, onoe yo mung naliko tumuju ing arep

susah sumusah iku ; karep sing ora katekan

dene sing wus tanpo bungah susah

iku nalikane karep katekan ora bungah

hiyo ora susah nalikane karep ora katekan

ora susahe iku dudu ateges sabar

dene sabar iku mbetah mbetahno (ngempet piloro/susah)

mulane rogo biso santosa, ora rinusak dening bungah susah

tanpo bungah susah iku padunungane rogo santosa

Ingkang Wus Tanpo Luwe

tanpo luwe iku dudu rogone wareg teros

dudu tanpo mangan wetenge kaisi

tanpo luwe iku ateges 'ORA KELUWEN'

terange mangkene :

wareg iku weteng kaisen pepanganan

luwe iku weteng ora kaisen pepanganan

sing durung tanpo luwe iku mangan, amergo kroso luwe

utowo mangan perlu ngisi wetenge

dene sing tanpo luwe iku mangan ora mangan wus ora ono bedane

mangane iku ora amargo luwe utowo perlu ngisi wetenge

tanpo luwe iku dudu rogo sing ora mangan

nanging ora keluwen (ora bingung kumudu ngisi weteng)

dene sejatine sing pingin mangan iku dudu weteng

hiyo ora kanggo weteng

sing pingin mangan iku sejatine cangkem ateges ilate pingin ngrasakno 

cangkem iku sing duweni karep mangan dudu weteng

amargo sing pingin mangan iku cangkem, mulo kabeh sing isih duwe cangkem tetep pingin mangan

sanajan toh wetenge iku wus kaisi pirang pirang panganan

ateges wus wareg nemen, hiyo isih tetep duweni pepinginan marang pepanganan

dene pepanganan2 iku kabeh sing marai rogone berkembang (tumbuh) soko sari sarine pepanganan

ateges perkembangane balung nganti wulu.

Luwe iku kroso wetenge gothang (ora isi pangan)

keluwen iku banget olehe pingin mangan amargo ngroso luwe

dene kanggone sing tanpo luwe iku 

pingine mangan ora amargo kroso luwe

olehe mangan ora mergo weteng gothang ugo isi

nanging mangane amargo pikarep cangkeme

dene kanggone sing durung tanpo luwe

iku kuwate ora mangan amargo wetenge isih kroso isi

lan mbetah2no kuwat ora mangan nalikane weteng ora isi

mung tetep olehe pingin mangan amargo kroso wetenge gothang

dadi tanpo luwe iku rogo ingkang nuju sampurno

hiyo nuju sampurnaning rogo

amargo wus ora bingung naliko wetenge luwe

ugo ora sumpek yen wetenge wareg

Ingkang Wus Tanpo Turu

turu iku ateges angen angen ora makarti

ora makarti iku angen angen ora tandanggawe

amargo poncodriyo pisahan karo ratune

mulo rogone ora sadar menowo makarti

ateges ora sadar nalikane poncodriyoe obah

yoiku yen poncodriyo tininggal dening ratune (angen angen)

Lumrahe turu iku klawan mereme mripat

mung mereme mripat ora mesti turu

ugo ono turu sing mripate ora merem

amargo turu iku ; 'angen angen ora makarti'

sopo toh sing turu?

hiyo sopo bae sing lagi mbuwang angen angene

anane angen angen ora makarti iku amargo 

anane rogo sing pingin leren (pegel)

dadi sing turu iku ; angen angen

dene rogone isoh ugo obah mrono mrene, mung ora nyadari yen obah

dadi sing pingin turu iku : siji.poncodriyo loro.angen angen telu.pakulinan

sing tanpo turu iku ; rogone ora njaluk turu, ora butuh turu, wus betah ora turu

hiyo iku rogo ingkang sampurno

wus tanpo ora sadar wus tanpo ora eling.

PEPENGET

Ngrogo suksmo iku dununge rogo sampurno

yoiku suksmo sing wus sampurno nyandangi rogo

Tanpo kepanasen lan tanpo kademen iku gegandengan

ateges iku nunggal kahanan, nunggale nunggal pisah

Tanpo pegel lan tanpo loro iku hiyo nunggal pisah

tunggal kahanan mung rong rerupan

sing wus tanpo pegel hiyo wus tanpo loro, ugo sewalike

Tanpo bungah lan tanpo susah iku yo tunggal

Tanpo luwe lan tanpo mangan ugo tunggal

sing wus tanpo luwe yo tanpo turu, sing tanpo turu yo tanpo luwe

Kanggone sing wus tanpo luwe wus tanpo turu iku ; sanajan rogone turu rogone mangan

tetep bae rogone wus ora butuh marang mangan lan turu

Sing wus tanpo kademen iku rogone ora butuh klambi kandhel nalikane ono ing panggonan adem

mung klambiano kandhel iku ora amargo kademen

dadi ono bedane sing wus tanpo kademen lan ora

sanajan podo podo nganggo klambi kandhel

mulane tetep ono bedane sing wus tanpo luwe tanpo turu lan ora

sanajan podo podo mangan turune, ananging ; 'rogone bedo'

Sing wus tanpo luwe ; ora mangan

Sing ora tanpo luwe ; ora mangan

iku tetep ono bedane, sing tanpo luwe ; ora mangan ; amargo wus ora butuh mangan

dene sing ora tanpo luwe ; ora mangan ; amargo mbetah2no ora mangan

mulo tetep mangan wekasane, perlu ngisi weteng sing kroso gothang

lali yen pingine mangan iku amargo isih duwe cangkem.

SAMBUNGE CUPUMANIK HASTOGINO

Tanpo kademen tanpo kepanasen iku dumunung ing rogo

ateges wulu lan kulit sing wus salin

Tanpo pegel tanpo loro iku dumunung ing badan nyowo

ateges dayaning badan nyowo kang wus sumebar ing rogo njero

Tanpo bungah tanpo susah iku dumunung ing pangroso

yoiku nalikane bungah susah wus nunggal lebur

andadekake salin kahanane, dadi : jumeneng klawan seneng

nalikane roso pangroso salin kahanan, jiwo ugo salin rupo

Tanpo luwe tanpo turu iku dumunung ing suksmo

yoiku naliko pambunteling suksmo arep sampurno

sampurnaning rogo iku sampurnaning suksmo ambuntel rogo

yoiku sing diarani katitisan 'wahyu cokroningrat'

GAMA BUDHI KAWERUH URIP SAJATI

Podo Rahayuo , Sagung Dumadhi

Read More

JANGKEPE DOYO LAN KAKUWATAN

GAMA BUDHI KAWERUH URIP SAJATI

Uwiting urip
Hiyo ateges wite sakehing wiji
Dadi sangkane kabeh isi
Doyo iku akeh banget macem jinise

awit sing kasar nganti sing alus alus

mung sarupane kabeh doyo iku ono rong werno

yoiku obah lan meneng

Adem panas padhang petheng iku patang doyo bawono

kawengku dening gether

gether iku hiyo doyo, yoiku doyo sing mahanani gegathukane kabeh kahanan

Lemah geni udara banyu iku patang unsur bawono

kawengku dening howo

howo iku hiyo doyo, yoiku doyo sing mahanani santosane kabeh kahanan

Kabeh urip iku urup, urupe urip ateges doyone urip

mulane ono tembung urip iku urup

amergo pati iku tanpo urup

urupno uripmu ateges kuwatno doyone uripmu (nyowo)

Kabeh isen isen kabeh sing ono iku

sejatine klumpukaning sapirang pirang doyo

awit lemah, watu, kayu, banyu iku amung

doyo doyo sing nglumpuk nunggal larase

Ora ono rerupan tanpo doyo

ora ono sworo, gondho kang tanpo doyo

iku kabeh mung gether urip

hiyo gether urip sing ngenani poncodriyo

nunggal laras terwoco njur diwehi aran

olehe menehi aran kanggo tetenger

sing sejatine hiyo tanpo aran

mulo weningno ciptomu, supoyo weruh sejatine rupo

leremno rahsamu, supoyo weruh endi urup endi urip

menengno rogomu, supoyo weruh endi sing dirasakno, endi sing ngrasakno, endi sing digae ngrasakno

KAWISESAN

Ono kuwoso ono nguwasai ono momong ono ngratoni

kuwoso iku dununge wenang

nguwasai iku dununge wiseso

momong iku dununge wengku

ngratoni iku dununge ratu

Kawisesan iku dumunung ing laku meditasi

ateges murih anguwasai sawijining doyo

nguwasai iku biso ngendalino

digae ngene biso, digae ngunu biso

tanpo biso ngendalino, iku aran mung kuwoso

ateges kakuwasaan, kakuwasaan iku dununge rojo

biso ngendalino hiyo biso ngarahno

arep diarahno mrono mrene hiyo biso, koyo dene hipnotisme

Kabeh sing meneng kabeh sing obah iku hiyo klumpukane sapirang pirang doyo

awit sing atos sing cuwer sing alus sing kasab ugo asap iku hiyo doyo doyo

pandulu klawan pangroso awak

kekarone nggelar jagad ; gelare ; rerupan kasab, rerupan atos cuwer, rerupan adem isp....

pandulu klawan pangecap nggelar jagad

jagate yoiku : rerupan legi, rerupan pait, rerupan kecut isp...

sing atos, sing cuwer, sing rerupan, sing werno, sing lembut, sing legi pait sateruse...

iku kabeh sejatine gether urip sing selaras karo poncodriyo

dene gether urip iku biso dadi panas, dadi adem, dadi pait, dadi alus kasab

gumantung poncodriyone (sing nggelar jagad).

TARIK TINARIK

Iku wus dadi wewatekaning doyo, nalikane selaras hiyo tarik tinarik, yen ora selaras mesti tolak tinolak

mulo ono kedadean sing atos sing cuwer ugo asap

rogo duwe doyo, suksmo duwe doyo, badan duwe doyo, nyowo duweni doyo

jiwo roso ugo ono doyone, sing kabeh mau doyone dewe dewe (ora podho)

larasing doyo iku tarik tinarikan ; iku sing mahanani nunggal lan saline kahanan

ora biso nunggal hiyo mung amergo ora salaras, mulo hiyo ora biso salin kahanane.

PANCER ANCER ANCER

Lintang suryo mbulan iku dadi ancer ancere bawono

bawono iku dudu buwono

bawono iku soko tembung ba - wono

ba hiyo teba ateges gumelar, dene wono iku karepe papan panggonan sing kaisi sapirang pirang doyoning dumadi awit sing kasar nganti sing alus alus

dene dumadi iku ora mung manungso bae, kabeh urip ning arcopodo iki arane dumadi

Pancer iku ateges sumber utowo pusat

pancering doyo hiyo sumbering doyo

amergo bawono iki duweni doyo panarik, mulo biso anyerot doyo panasing suryo

doyo ademe mbulan ugo doyo getare lintang

Arane 'cokro tirto pramono' yoiku sing ono ing telenge bawono

kang jejuluk tirto kamandanu, yoiku banyu sangkane bawono

sing dadi pancere bawono, yoiku sing anarik doyoning suryo lintang mbulan

sing tau dadi rebutane poro dewo, kaaran tirto prawito, nganti ngubek samudro

perlu nggoleki tirto prawito

kasebut banyu suci, mung iku dudu banyu suci, nanging wiwitane banyu

kacerito : banyu mau dijogo dening hyang antobogo.

Kabeh doyo ono pancer ancer ancere, sing ndasari urupe

saknjerone kasar ono alus, njerone alus ono alusan maneh, njerone maneh ono luwih alusan maneh mangkono sateruse....

katone wutuh siji, mung yen dipreteli dadi sapirang pirang akehe

hiyo klumpukaning pirang pirang doyo

pancer-ancer ancer-puser

gedene doyo iku uruping doyo arane digdoyo

dene uruping doyo iku aran KAKUWATAN.

GAMA BUDHI KAWERUH URIP SAJATI

Podo Rahayuo , Sagung Dumadhi

Read More

Doyo Lan Kakuwatan

GAMA BUDHI KAWERUH URIP SAJATI

SINAU KANG ARAN DOYO

Doyo lan kakuwatan

Kakuwatan iku uruping doyo, ora ono kakuwatan tanpo doyo

mung anane doyo ora mesti bareng anane kakuwatan

larasing doyo kalumpukake sangsaya mundhak gedhe

sing alus tuwin sing kasar mung kacek piguno bebayane

tlaten olehe golek golek anisihake alus kasare

prayogane kerep niteni ing saben dino lumakune

olah doyo ora katon lumantara ketoro

awit doyo soko njero kang katon ing njobo

ugo doyo soko njobo kang katon ing njero

ora ono bleger rupo tanpo ananing doyo

ora ono obah obahan tanpo ananing doyo

hiyo ora ono mongso tanpo doyo

sing ono njobo iku gether urip arane

sing ono njero iku uruping urip arane

doyo tunggal sangkane, dadi sapirang pirang parane

DOYO KASAR LAN DOYO ALUS

Wong mlaku wong lunggu wong meneng iku kabeh ngempakno doyo

sabendino saben jam saben menit sadetik detike manungso iku ora pegat pegat ngempakno doyo

ono sing ngempakake doyo kasar ono sing ngempakake doyo alus

ono sing kulino ngempakno doyoning roso alus yo ono sing kulino ngempakno roso kasar

dene parane doyo kang metu soko roso kasar iku amung pepetheng bebingung ugo apes

awit kerep diempakake sangsaya mundhak mundhak gede doyone kang mahanani lestarine

dadi ono ing salawase urip, manungso iku ngempakake doyoning uripe kanggo ngurip nguripi tetandurane

yoiku tetanduran roso ; kang wus thukul ono ing njero sanubarine manungso

sapirang pirang werna maceming roso iku wiji sing biso thukul gedhe menowo kulino diempakake

endi thukule sing gedhe yoiku doyo sing bakal ngaling ngalingi tethukulan liyane sing cilik cilik

mulane wong sing kulino susah iku biso lali yen bungah iku ono, amargo bungahe katutup dening susahe

awit roso kasar-roso alus-roso luwih alus-roso alusing alus iku duweni jagad dewe dewe

roso kasar yo akeh banget cacah jinise, sing alus y akeh macem wernane, roso luwih alus hiyo akeh maceme

dene roso alusing alus iku kaaran roso tunggal, roso murni kaaran sangkalpa....

mulane manungso iku biso dadi bethoro dadi brekasaaan dadi memedhi dadi gusti dadi lelembut

biso dadi mustikaning jagad hiyo biso dadi leletheking jagad

biso manjing ing jagad padhang nrawang biso manjing ing jagad petheng dedhet

biso manggon ing kaendran y biso manggon ing guruloka ugo kajaten.

KAHANANING DOYO

Endi doyo Endi urupe?

ing nalikane uwong iku rerasan babagan rasaning kawruh, 

rembukan prakara kang becik (migunani marang liyan)

ning kunu roso alus mecungul, duwe kakuwatan nglindih roso liyane..

iku sarupaning doyo alus sing sumebar ing sanubarine, kahanane padhang lan adem

dene sumebare doyo kasar iku kahanane petheng lan panas, mulo yoiku bebakalan kang dadi pengajake pegel lan luwe

bebakalan sing ndadikake apes lan lelaraning awak, mulo akeh wong loro amargo akeh bebingunge

yoiku sing marai lumakune getih ora runut lan ora selaras karo doyoing sanubarine.

sadengah roso sing kerep empane, kerep mecungule, kerep ditarik doyone saya lawas sangsaya mundhak gedhe dene wewatekan lan karaktere uwong iku manut marang pakulinane, hiyo endi doyo sing kerep diempakake yoiku sing dadi bleger uripe

wong sing kerep manggon ing panggonane wong becik, kerep kumpul wong becik, iku sabendinoe yo anggendheng roso kang becik

urupe/kumorone panggonan ning kunu yo becik (....)

Mulane perlu banget kanggone wong kang ngudi kawruh kabatosan iku kerep kekumpulan, sarasehan

pamrihe y anarik sing alus kang sumingit ono ing njero, nalikane sing alus wus mecungul nglindih sing kasar, ning kunu doyoning urip nguripi kang alus, yen mongso iku roso kasar nganti sudo dayane, wong sarasehan ora kroso pegel, ngantuk, luwe

amargo pegel ngantuk luwe iku empaning roso kasar.

awit soko iku wong ngudi kawruh kabatosan perlu kekumpulan kang pamrihe ;

ngumpulake doyoe uwong akeh sing wus podho akeh aluse, kadadekake siji, klumpuking doyo mau andadikake kakuwatan gedhe kang biso anarik, anggendheng jiwo jiwo liyane, iku rupaning kahanan edhi ing sajeroing kaalusan, kang dadi sandi keraton ; sing kakuwatane biso amiyak sakehing doyo kasar ing sakiwo tengene, hiyo miyak doyoing angkoro..

perlune ya kanggo nyirep doyoing angkoro 

amargo soko kuwate doyo angkoro, 

nganti manungso kangelan olehe biso uwal, kagubet soko njobo njero.

PIYANDEL (percoyo)

Iku hiyo rupaning roso sing nganakake doyo, 

iku yo rupaning kakuwatan sing biso gedhe yen kulino diempakake

amargo saben doyo iku biso mundhak mundhak 

ya biso sudho kakuwatane yen ora tau diuthik uthik, wekasan mati..

piyandele marang dirine dewe iku perlu banget diundhaki doyone

amargo tanpo ananing piyandele diri amung ono gethir kuwatir pasrah..

menowo kuwatire sing kerep mecungul piyandele sudho dayane

dadi akehe percoyo marang diri iku anyudho gethir kuwatir

mung piyandel marang diri iku asale soko gumedhe ngegungake dirine

nalikane gumedhe mau wus kabuntel dening kaademan lan katentreman ning kunu roso gumedhe salin rupo dadi percoyo marang diri.

piyandel iku sawijining doyo sing biso ngowahake kahanan

arepo percoyo marang A, B, C, D iku biso dadi jalaran owahe kahanan yen percoyo temenan

coro saiki kaaran doyo kakuwatane sugesti..

bedaning piyandel marang diri lan piyandel marang sakliyane diri iku mung ono ing padunungane

dununge piyandel marang diri iku wus tanpo gumedhe amargo gumedhene wus salin rupo

dene piyandel marang sakliyane diri iku gumedhene tetep ono amargo isih durung kalimput dening adem lan tentreme

kang andadekake parane ora podo, sing siji gowo adem tentrem sing sijine ora gowo adem tentrem.

mulo padunungan jagate hiyo ora podho, sing siji padhang sing sijine ora.

GAMA BUDHI KAWERUH URIP SAJATI

Podo Rahayuo , Sagung Dumadhi

Read More